Un dos proxectos nos que Betula participa é a Custodia de ríos, que é unha iniciativa promovida por ADEGA (Asociación para a Defensa Ecolóxica de Galiza) de concienciación, educación e participación cidadá en defensa dos nosos ríos.

A educación ambiental é o pilar fundamental para acadar contrarrestar e revertir os efectos do cambio climático. É por isto que este ano,coincidindo coas accións e actividades polo Clima que se desenvolveron nas distintas localidades galegas do 20 ao 27 de setembro decidimos acudir ao CEIP Plurilingüe Os Casais de Maniños, no concello de Fene, na que participaremos unhas 60 persoas (entre nenos e adultos)

 

O obxectivo que se pretende acadar con esta iniciativa é lograr a sensibilización da sociedade dende unha temperá idade do valor dos nosos ríos e da natureza tentando concienciar aos nen@s do dano que se pode causar co simple feito de tirar un plástico na natureza.

Esta actividade tiñámola pensado celebrar o día 27 de setembro, mais as inclemencias meteorolóxicas provocaron que tivesemos que mudar a data para o vindeiro xoves, 3 de outubro de 2019. Esta xornada realizaremos unha saída ao Río Baa, que se atopa ao pé do colexio, e levaremos a cabo unha identificación dos microinvertebrados que habitan no río e logo facer unha limpeza dos refugallos depositados na cunca do mesmo.

Previo á saída, na mesma xornada, darémoslles aos nen@s unha breve charla explicativa sobre os ecosistemas fluviais e a súa contorna, o seu valor e a problemática da contaminación.

Entendemos que as nenas e nenos son o futuro e  por iso queremos contar con eles na XII Limpeza Simultánea de Ríos.