Non, Betula non estivo de vacacións durante o mes de agosto, as actividades desenvolvidas foron múltiples e diversas.

Se cadra a maior parte dos nosos esforzos centráronse en Montefaro e na finca que a asociación ten en propiedade trala cesión por parte de Quico  de Cervás.

Comezamos cunha labor ás veces frustrante como é a de achar os marcos da parcela; por sorte contamos con expertos rastradores…

Tras ter delimitada a parcela, fixemos unha primeira inspección para analizar o estado biolóxico da mesma. Comprobamos que está a rexenerar de forma natural bastante ben atopando pequenos castiñeiros, carballos, sanguiños, pereiras bravas entre os gromos de eucalipto.

A parcela está encravada nun lugar inmellorable ao pé da batería da Bailadora no concello de Ares. As vistas de Ferrolterra son únicas dende esta localización, unha mágoa que os eucaliptos non as deixen ver pero aquí é onde entramos nós!

Unha das actividades que realizamos foi comezar a marcaxe con paus de bambú de todas as especies autóctonas que fumos atopando para telas localizadas e non cortalas cando pasemos á fase de roza e deseucaliptización.

O interese paisaxístico e biolóxico do lugar é tan grande que iniciamos os contactos cos propietarios das parcelas colindantes á nosa para iniciar os tramites de compra ou cesión das mesmas. Sempre é unha tarefa delicada pois non sabes o que te vas a atopar pero nesta ocasión os veciños propietarios atendéronos cunha amabilidade exquisita o cal é de agradecer. Esperemos que as negociacións rematen con final feliz para todos.

 

E chegou setembro…

 

Para este mes temos convocada unha xornada de marcaxe, roza e deseucaliptizacion da nosa parcela e tamén dunha zona xestionada polo concello. A data fixada para esta xornada se o tempo o permite será o vindeiro 17 de setembro. SOCIOS VOLUNTARIOS NON PODEDES FALTAR!!

 

Outra actividade que teremos neste comezo de curso será a xa tradicional Limpeza Simultánea de Ríos “Móllate polos Ríos!” que este ano cumpre a súa XV edición.  A data prevista será o vindeiro 25 de setembro. Tentaremos dar cumprida información do evento nos vindeiros días.

 

E por fin parece que Betula vai contar cun Local a partires deste mes. Os trámites co concello de Fene están moi avanzados e dende a asociación estamos moi ilusionados en poder contar cun lugar propio onde levar a cabo todas as actividades que a custodia do bosque atlántico require e merece.

 

Non, non estivemos de vacacións, non queremos parar!!

 

Ti tamén podes colaborar con nós! Faite socio e, se queres e podes, participa nas nosas actividades de voluntariado!!