O pasado sábado 17 de febreiro Betula realizou unha plantación de arbores autóctonas nunha das parcelas en custodia que a asociación ten no lugar de Marraxón no concello de Fene en colaboración coa Deputación da Coruña.
Un emplazamiento espectacular en pleno canón do río Belelle propiedade de Carlos, socio e colaborador, que tamén estivo con nós durante toda a xornada.
Nos días previos, o traballo comezou cunha roza de toxeira que ocupaba a maior parte do terreo a prantar.
Posteriormente realizáronse os buratos na terra con axuda da afoxadora mecánica e un grupo de socios voluntarios, sempre en pé de guerra, sobre un terreo complicado pola abundancia de pedras.
O sábado amenceu cun día espectacular e os nosos incribles voluntarios foron chegando ao punto de encontro dispostos, coma sempre, a poñer o seu grao de area en defensa do patrimonio do noso país.
Tras unha pequena charla didáctica efectuada pola incansable Luisa, o grupo púxose en marcha; Carballos, Bidueiros, Castiñeiros ou Acivros comezaban a ter o seu lugar no mundo. Unhas árbores de calidade procedentes en parte do Viveiro Ribeirao no concello de Monfero.
Nesta ocasión contamos coa colaboración da fundación LifeTerra, unha entidade a nivel europeo que tras coñecernos interesouse polo noso proxecto cedéndonos unha centena de árbores para o seu posterior seguemento e apadriñamento. Agardamos atoparmos máis veces no camiño!!
